puisi maduraku

salendang taresna

Ro'om tase' bhiru
aburu juko' nyallam e lanjang obu'na dika
nyallam e sagara .alajar kom komanna

duh...,dimma se esareya
bhulan elang e keco' dalko'
ngabbar e kalemonganna ojan
ngabias bulu kole'
ngattar talebat pasra e kencop
daunna sere aora' tonggal

e raba'anna batokonco'na barto
calemot pattang araga sokma
taresna ampon tasongkor
alabun sareangnga mata bula

toju' maraddin songkam pagulina
alea' leo' pola tenngkana dika.
maguli ate se nangale kobassa
rassa tapalko' jaran gujangnga

naman arta' tae lala'na
cangkamma dika bulan pornama
se atoles barna harkat bilagunna
matanyang panabbussa bhula
agiba pelka' ngenom pellona dika

asalendang taresna .
asanding e attas sodagga bulan nyongsang
se bada e amperra matana dika

; bakto malam mimpena



geddugan giligenteng ,2012


ngal bangal mardha


Caloret ampon e gangse
tajam a gilap pote

sarkawi ngantos e babana accem
nyaba balas nyaba.

dhara balas dhara.

nyaba tadha' kaballina
kobasan settong se ecepta

gunong tenggi e lebati
tase' omba' e lajari

e labang saketeng
bapa'-babu' apassan salamat
tengateya dalam ataro nyaba
melleng sakoni' dhara kaloar mardha

marhabi ampon dhatang.
caloretda ta' kala tajam
agilap kelap matogal raga

kare se ngadduwa elmo
sangkolanna kae tor juju'
se atapa e guwa guwa kona
lamba' dimen se kalonta

sarkawi matana mera
marhabi matana mngara
ngadap ajal nyabut caloret
asapo' mantra maronto ate

' tatta' bula ,sare bu'lambu'na '

sarkawi nangtang sambi ngael pena'an
aba'na se siap mate akare sakte

caloret ampon e gangse
tajam aguilap pote

tape marhabi ngal bangal mardha
mole alambay a tabbus malo

nyo'on sapora ka se kobasa
alako congka' ka tatanggaa

e labang saketeng barna mera
sarkawi sem mesem
alo'or tasbi , metong omor

ka agunganna se kobasa settong se ecepta



bangkalan-songannep 2012



agangan maronggi


maronggi se tombu ebudina bangko
labba' dhaun maocet ngodana ngabhiru.

e labang dapor ,bula ngabas ebu
ngoca' palappa ganna' ,abugal raga
nyarrat e dalam cobi' se asabung
kalaban cak kocek bato

gala se lanjang nyojju bunggar
se ngabhiru

" kala' da ngodana , buang wa towana '
passanna ebu dimen kalonta


e attas tomang .
eang naglkal naraka

maronggi pon epesa
dahri ranca' konco' bunggal daunna

jail nyapcap .
elong arassa tapalko'

nyeom ro'om palappa se ngarassap
ka ragana daun se molae e cabbur
ka naglkalla aeng dalam banji
attas tomang

dalam pereng .
nase' jagung
juko' karrengnga kenduy
abaris nagntos pamanjung

ebu mesem
bula mesem

ojan pello pon darras
dari pepe sampe' dhai

jila parrang kalaban bibir
se ngattar ka potena gigi

tabu' a dikker
tanda nikmat kobassana
dari se kobasa pangeranna risgi

agangan maronggi.
sangkolanna nyae tor kae
juju' tor bungso
se ampon ngantos e labang soarga



ragang ,geddugan gili genteng -jekarta 2012



ketab aeng mata

aba' ampon posang
aeng mata se gaggar
dhari molka' matana dika

bulan garring aguring nemor
e tampo'na ojan agarrus kakerrongan

bibir bula se saleng nyeom manis madduna
gaggarra rese' campor dhara
ta' tega ngabas dika nyelle' andang
manggar ate e mangkang aeng tase'

sanonnto ,pelka' jila mapelko'
lajar tolang se abantal sagara

ketab aeng mata e baca dika
e dhalam sarong abade' lasem

aba' ampon jarnang
aeng matana dika
terros malanjang taneyan pote tolang
nyombar ka pagar nangka ngoda
nyelbi'
akanta tase' e seba'
tonggat mosa

ketab aeng mata
magga' tale kotangnga dika
nyombar sokma buwa dalima

bila bhula nongko' e bibirra dika
ondam solap-are ngoncar kelap
alonca' mano' gatti' macoet bangalla bhula
natta' -nyanggarram alessa dika

buja se accen -gula se manes
ta' magujang niat bhula
makabin tera'na robana dika
kalaban mesemma bhula se talebat mera

e konco'na madura
caloret e gangse tajam

magaltong ketab aeng mata
e pepena dika
se e are' ebung embumganna bulan takepe'



bekasi-jakarta 2012


bhila nyaba ampon dapa' anggan dhada

Bhila nyaba ampon dapa' anggan dhada
rassa sake' kasta ban roga

kabbi taretan-poto e olo' ka meja
a sanding tangis ampon tada'a

na'poto ampon pada akompol
saleng rebbu' agabay pamekol-paesan
saleng pandang ato'or malate-bang pandan
ro'om minnyan asalabung ngastete

bhila nyaba ampon dapa' anggan dhada
abantal carreng se bada e kopeng
malaikat katon e ada'na mata
raga nyongsang lebat sokma leng ngaleng

" kun fayakun "

asalpat nyaba ,abunggam dhada
mole abali ka guste kobasana

duh..., na' poto
passan galla' ja' kaloppae
sambajang -poasana se e molae
paganna' onggu daddiya panyare
kasannangan pagi' aheradda

dhuli pas giba .
ja' ta' santa' mekol bula
ngabasa ponakan tor manto

ajilada tambang yesin
se ebaca e olo bakto
nyo'ona tobat se tada' padha
akare kasta on-laon ganja

bhila nyaba ampon dapa' anggan dhada

" inna lillahi wa inna ilaihi rojiuun "

dhari tana abali ka tana
asambung ka pangeranna


ghili -genteng-jekarta-bekkasi,2012



gaggarra aeng socana ebu


Tada' panabbus raga
se labbi molja tor raja
monggu dha' ka bula

salaen panyo'on salamat
sarang ,
gaggarra aeng socana ebu



garbato-pangarangan-garbato-jekarta ,2012



asaka' etana buja-bhako


Nyelbi' -mocet dalam raga
tana se lanjang dhari makkasan kantos songannep
magannap ate se callap karrong
kalaban ro'omma bhako-acaenna buja

madura ,sangkolanna juju' tor bungso
se lamba' dhimen alaban panas tor ojan
kaangguy ana' poto se nabang bakto
akalambi pelka' abantal pello

asaka' e tana bhako-buja
ate bula posang naylengsang
karrong bakto molong bhako
agaluy potena buja
apolong sarang ebu -tatangga

e babana mata galla' kalaban bhunga
rembi' e dhada bula
aranca' ka bunggarra soko
se ajalan asanding kejung baba bulan

careta ampon e karang
dhari tajam are' tor landu' -nanggalana

se alabun compadda are e gar bara'
alambay  ,naman ojan tombu buja
naman bigi tombu bhako

esto dha' jang ebu e tana madura


2012 ,songgannep-akkasan-sorobaja-bakkasi



palappa ganna'


E attas carakenan
atompo' jai-konye'
katombar se akabin kalaban komire

cobi' ngobal agaluy jila
ca' koca' ngamo' ngancor jail
abasto pallapa daddi baddi alos

palappa ganna' lakar daddi pamaste
ebu se akanca dhapor
alaban abbul-asapo' apoi
agabay tagguli-kowa maronggi
juko' darri accen paddis
a sela cabbi lete' pello se  a gili

jambar ate bakto bulan poasa
dapa' bakto ka abuka
e attas meja abarna barna
nagntos adzan kaburuna

paggun palappa ganna'
se daddi pamekol kabbianna
dhari bunggar sampe' konco'na
ngalkkal langge' -abandam sokkor


songannap-tanjung ,2012



kaleppon ceddot


E tana madura ,
anga' callap macem jajanan
agili magujang garammas rassa

bhila teppong ampon e gula'
kalaban aeng dhaun pandanna
ta' kaloppae aeng kapor sere
se atampor kalaban accen bujana

tamba aeng ni' sakoni'
bannya' talabat korang samporna
dhuli gula' sampe' camporan
bisa e gabay -nyobar ka bunga'an

kala' ngangguy tesi
monggu pabungkol
cole' esse'e kalaban gula mera
se ampon ngara
pas pabungko; pole sambi ngastete dhari ate

kalla dalam aeng se ngalkal
sampe' ngambang agambang ka nge' langge'an
angka' sareng pa karreng

duh...,,aling gulingan
e parodda nyeor mgoda

saba' e attas pereng
daunna  gaddang
garrungan ampon ngarassa
abunto' lapar -a takbir kannyang

kalappon caddot
daddi pangobal aher
monyena tabu'
annyat bhila e kekke'

gilina jail e morka'na jila



2012 ,jekarta-bekkasi-gili genteng-bekkasi

Nyèllo' Mardìka

Monggìng bàrà' tana lonta

maparjùgà pananggàlàn mera

nyontàp e komkomanna dàun tareta

nyapcap kalonta careta
enagàra nyèllo' mardìka

.

tappor kelap asompa'a

ngèlla jàman se pon kasta

bànneng ate kantos taresna

settong tojjuàn asapo' panyo'on ponca mera

.

nyèllo' mardìka ka sodà' teang

pon ekarassa pan saponapan careta

se e anggìt dàri mera pote mandìrà

ales ebù kartini tombu dàri sokma are

.

duh...bàpa' ebù bàkkel kaulà

saebu pangaràp e ate bulà

aeng mata se gàggàr e palepor mora

nandà'àgì jùjùr bàkte panèrros bàngsa

.

nyello' mardìka

ojàn nemor se pon aduri cokka

compèt e bàrà' nemor kara




jàkarta_songennep 2011

E socana ebù

ebù ,

sengko' acareta'a ,__

acareta'a andàng
e matana ba'na


; bùlàn takepe' _ reajà kona

pappa'an sere se a ora' settong
nyombàr ka talkana tèkèr pandàn

se e anggi' bàkto pornama malàm

nyèlle' koto e sagàrà laggù


ebù ,

ajja' kobàter

omorra tase'
e mesèmma bà'na

e sempànna e lampattà
tang bintangan bàn sesse'na
juko' pendàng


agàlbù' e orap
kalabàn gùlà cobbù'

; sanonto ampon rampong , ebù

pan saponapan careta
maksa mardìka

malontor morkana bàngsa
kalabàn panyo'on robàna bà'na

bìnàrràng e kole'na buàna koddù' ngodà


ebù ,

lalampanna bà'na
se rattìn robàna

e taburi kàmbàng taresna
nyongsàp pas e bìgìna langsàp

; pettong kale
male' jànor e taneyan

lanjàng ka palabbùànna
aeng matana bà'na , ebu


ngabàs ka olona obù'na bà'na
pote se abàrnae kobàterra abà'

nyo'on saebu dùàna

mangkatà a gàntonga elmo
e capcappà pellona are

se nalar e konco'na kolare
re lere




jàkarta , 2011

Sakolellana Ojàn

Moncar dàri sagàrà

lampattà nyongsàp
e morka'na panemor kona

pàbbàr pànjung
kàmbàng tanjùng room buànà

re lere e konco'na kolare
ngarèmmes talkana abà'

nyelbì' agàlbì' pas rèmbi'
ka moara langngè'

sakolellana ojàn pon e bitong

ngolbu' ngagàràn e kotta kotta

kasohor poncana agàluy ka sonarra
se ra mera

tonggàna langngè' e talàbbùr

masodà' sokmana aros se loros
bàccana lorong sakètèng a cèllot gàlmot

lecen pas accen ka jàmbàrrà ate

se loor e nemor kara




jàkarta . 2011

Tanah buja e kampong loka

 

 

 

tera' bhulan e gaggarra nyeyor bhuru'
agandu' lalampanna para patoah
Dhari sokma ka barnana andang e palappa ganna'
Nyonglet etabuyyi mennyan__

Duh...ebu-
Tanah loka e kerreng-kerrong kampong loka
Bara' dajana girpapas ka asta tenggi,,
Jambar e toap apoi
Asanding sokma
Agellu' pornama

Senga',tase' gi' bhiru
Etoorra juko' pendang
Epaessa buwana pace
Se asesse' e sagara kona

Leppet pas tetep,
E dajana pasar sattoan
ja' kobater
Nase' koneng e pellona dika,
Ta' asat kantos pettong toronan
Ajalling omba' nemor e sokona
(gai' bintang ale' gaggar bhulan)
Nyelbi' dhalam dhada
Ngagareskes apajung loka omor
Noro' bunte'
E lajar angen
E babbar kasta

Buja se accen,,
Maksa binarangnga aba'
Ngantos ngodana bhulan

Bila pon epanyongsang__
Tale papasten e lebuni koros ate
e calemodda malam se pas ngerrem e janggang nafsona bula
Se rangngo' e tolesi aeng mata kona

Tanah buja e kampong loka,
Kare se maksa'a landu',
Se mapotea dhara
Se la daddi marda..,

E buana tales se ngoda
Bula mogar tase' ka tangessa se mataremtem ate se nangis e samalam pentheng,_,



Jhakarta,2010